نجمة

عندي مدة نلاجي ... نلوج على حاجة ضاعت عندها سنين .... إحساس يتمناه أي انسان .... نلوج على راحة البال ... على السعادة كيما نقولوا .... على أيامات تعدات كيما سوايع ... كيما رمشة عين ... أيامات كنت فيها أسعد مخلوق في دنيا ... نلوج عالحب إلي ضيعتو... نلوج على أحلام بنيتها ... على وعود خذيتها... نلوج على طفلة حبيتها ... طفلة عرفتها صدفة ... لعبة وضحكة ... كانت حكاية غريبة ... كانت بيناتنا مسافات طويلة .... أما ما منعني حتى شيء ..... كملت مع لحكاية ... سميتها نجمة وصورتها في سمايا ... سهرت معها ليالي ... وحكيتلها على حوالي ... سمعتني وسمعتها ... عرفتني وعرفتها ... حبيتها ... عشقتها ... تنفستها ... أدمنتها... بدلتلي حياتي.. نستني في همومي ... رجعتلي الامل في دنيتي... تعدات معها سنين حلوة ... وفي لحظة نجمتي طفات ... وحياتي ولات ضلام في ضلام .... مشات وهزت معها الفرحة ... هزت معها الرغبة في الحياة ... أنا الغالط.. أنا إلي خليتها تمشي ... أنا إلي طفيت نجمتي وصورت في بقعتها شوك وطريق ضلام ... بقيت عايش عالاوهام .... عملت مالحزن صاحب والعذاب رفيق ... من وقتها نستنى في معجزة ... نستنى في سيناريو متع فيلم رومانسي ... نستنى في نهاية سعيدة ... و مازلت نستنى ... يمكن تكون نهاية حزينة ... يمكن البطل تتبدل حياتو وتكون نهاية من نهايات إلي يفزدو حلاوة الفيلم ... يمكن البطلة تكتب سيناريو اخر ... كل شيء ممكن ... إلا حاجة وحدة ... فقرة في القصة ... مشهد تمثل وما يتفسخش ... لحظة إلي تولد الحب في قلب البطل. 

وين على خير ؟؟؟

لماذا نتصارع على شيءٍ يمكن أن يحل بتفاوض ؟؟ هناك أمران لا نقاش فيهما :

1/ الجماهير التي نزلت إلى شارع الحبيب بورقيبة يوم 9 أفريل كان الأجدر أن تلتزم بالقرار الوزاري وتكتفي بتظاهر في شارع 

محمد الخامس أو أحد الشوارع المجاورة له. ( العاصمة واسعة يا ديني)

2/ بالنسبة لتدخل قوات الأمن العنيف كان من الممكن أن يتفادى الجهاز الأمني كل هذه الاشتباكات بتطويق المنطقة وعدم ترك أي 

مجال لدخول المتظاهرين ( على أساس انو وزارة الداخلية ماكنتش تعرف إلي فما مسيرة)

شوية تحليل ( حمد المغيربي رجعت روحي) :

1/ حسب ما نشوف فالفسبوك الباجات 3 أنواع: الأول مع الوزارة ويبرتاجي كان في فضايح المتظاهرين ويسب فيهم وياخويا قداش 

شمايتيا، النوع الثاني عامل حقوقي وجايبها ديمقراطية يبرتاجي في تصاور الحاكم  والمجموعات ألي سموهم ميليشيات الحزب 

الحاكم، أما نوع ثالث هو هاك الباجات متع مسكينة يا تونس ومتع جماعة ما علبالي.

2/ أعضاء المجلس تأسيسي اش مهبطهم لشارع ؟؟؟ كن يحبوا يمجدوا ذكرى شهداء ينجمو يقراو الفاتحة فالمجلس ويعملوا دقيقة 

صمت ويعبروا على كل إلي عينهم فيه ويتلهو فالخدمة إلى عطهالهم الشعب

3/ شفت برشا تصاور خلتني نشك إلي بالمجد فما مندسين فالحكايه أما مشيرتين ... شكونهم وشكون بعثهم التحقيق يجيب ....

ملخر هكا منش بش نجمو نقدمو حتى خطوة في مسار الديمقراطية والحرية ..... سوى من ناحية الفئة التي تطالب بحقها في تظاهر 

ولا من ناحية الأمن إلي إستعمل القوة .... كن بش نواصل هكا بش تصير  انقسامات كبيرة في الشارع التونسي (هذا على أساس 

انها مازالت ما صارتش) وموش مستبعد نصل حتى إلى إستعمال العنف من  المواطنين تجاه بعضهم ...

الحاجة إلي حبيت نوصللها: يزي ما سبينا بعضنا ويزي من التهم الباطلة إلي نتراشق بها كل يوم ... (منحكيش على الفئة المثقفة 

متع البلاد خاطر موش مواطن عادي كيفي انا باش يعرفهم شنوا صحيح وشنوا الغالط)  نحكي على المواطنين إلي كلهم كيف 

بعضهم، تجمعهم رايه واحدة، يجمعهم حب الوطن، جمعتهم كلمة وحدة ودمعة وحدة، مواطنين  كلهم صوت واحد لا همهم أفكار 

سياسيه ولا معتقدات دينيه، كان همهم الوحيد هو  إسقاط الظلم والظالم ، سهروا يعسو مع بعضهم وخرجوا لشارع مع بعضهم، 

حبيت نرجع ونشوف شعب قالوا عليه واعي، شعب  عرف يتحرر من طاغيه.....

نحب نعرف علاش جمعتنا كلمة وفرقتنا فكرة؟؟ علاش كنا خوات وتوا ولينا ضراير؟؟ علاش كان إلي ما عنداش ياكل بلاش وتوا 

حتى إلي عندا معادش لاحق بش ياكل؟؟ ........ وين ماشين ؟؟؟ وقتاش بش تفيقوا ؟؟؟ فاش تستنو؟؟ .....

نهايتي

 

ما اقسى تلك اللحظات التي ترى فيها حلمك يتلاشى بين صفحات الأحزان وما أصعب ذلك الأحساس بالعجز وانت تفقد الأمل في غد مشرق ،ما أصعبه من شعور عندما تخرج من طريق مسيج بالورود لتعود إلى طريقك المليء بالأشواك، إحساس غريب عندما تكون حياتك مضاءة بنور جميل يختفي فجأة ليتحول إلى ضلام دامس. تنتهي الكلمات ويبقى القرار قرارا، قد أقبل برجوعي إلى ملعبي القديم وإلى وحدتي القاتلة ولكن لن أقبل بأن أكون سببا لحزنك ولن أترك لليأس مجالا لينال من أحلامك، سوف أبقى الصديق الذي عهدته والأخ الذي لطالم كان بجانبك.... فلا تحزني على وأسعديني بفرحك وضحكاتك ، كوني الطفلة التي أعرفها والمرأة القوية التي اتذكرها، كوني كما انتي فصداقتكي تكفيني...

حكاية

نحكي على الحب وجعاتو ... نحكي على الفراق وليعاتو .... نحكي على جرحي إلي ما برا وعلى قلبي إلي ما صفا .... على سنين تعدات منغير رجوع ... ليالي تعبات بدموع .... دموع تمسحوا ومشاو .. جروح تحلو وما براو .... حكايتي مازالت ما وفات .. ليوم رجعلي الأمل ورجعت حكايتي كيما بدات ... ليوم قررت بش نحل صفحة جديدة ... نكتب عليها قصة معبية أمل... نكتب بالألوان الكل ... نحي منها الاحزان ونفرغ قلبي المليان .... نحب نعيش مطمان ... لا نحب لا فراق ولا نسيان ... نحب على حكايات أيام زمان ... ملك وأربعة نسوان .

علاش يا دنيا علاش

علاش طلبتي حبي .. ونتي ليه رافضة 

علاش عطيتني لاحساس ... ونتي عليه عاجزة

علاش بكيتي عيوني ... ونتي ليهم عاشقة

علاش جيتني .... وانتي على الهجر ناويه

علاش يا دنيا علاش

عمري ما جرحت أما تجرحت ألف مرة ومرة           

ما عذبت حد لكن تعذبت لجرحي وجرح غيري

عمري ما نسيت بشر أما أنا ديما منسي 

 ما هجرت حد لكني بالهجر مكبل

 عمري ما تمنيت الوداع أما حياتي تبنات عليه

ومزلت نسال علاش ولكن ما من مجيب  

جوابي

تتعدى الأيام وتهزنا سقينا للمجهول ... ليك أنتي نكتب وليك انتي صورت تصويرة حلوة نسجتها من تعب وخوف، من سهر ودموع، ليك انتي نشكي قسوة الزمان وغربة لمكان ووحشة ليام، ريتك حلمتي وحسيت بيك تسري في دمي وروحي، وكيف تغيب عليا يخرج قلبي من بين ضلوعي، ستنيت برشا بش نسمع كلمة نحبك ، تمنيتها مرة تخرج من بين شفايفك ، مصدرها قلبك، تمنيت نسمعها اخر كلمة في حياتي، حبيت نحضنك ونبيع الدنيا وما فيها على جال بوسة من خدك، ما تخلنيش حاير، هايم وحدي، ما تخلنيش نتخبى ورى غلاف انسيان. نحبك؛ يا ريتك تعرف قداش، يا ليتك تحس شنوا معناها، أما توا فات ، صبري وفا ، توا عرفت إلي إنا نحلم وحبك شمعة حياتي وكان ضاع مني نضيع طريقي، فما نهار كنت نحبك ومازلت نحبك وبش نقعد نحبك لاخر لحظة في حياتي، ولازمك تعرف إلي حبك حطمني وسلب مني روحي وذاتي ، أما مانيش مسلم مهما كثرت وجعاتي. 

فرحة لعمر

أنا ليوم فرحان علخر مش على خاطر مشيت ننتخب هاكي فرحة وحدها أما كيف شفت المدرسة معبية بالعباد كبار وصغار ، شباب وشياب ، نساء ورجال، كلهم جايين على خاطر حاجة وحدة، حب الوطن ، الأحساس بالمسؤلية، كيف نشوف مرا كبيرة خارجة وتبسيمة في فمها وتوري في صبعها بحنة تونس ازرقا ، نحس بالأمان والحرية ، نحس إلي شعب تونسي بالمجد يخاف على بلادو ويحبها كما قطعة من بدنو ، ليوم كيف نتفرج في تلفزة ونشوف مكاتب معبية من صبحية ، نشوف خلايق الحومة مصبحين وشادين اصف ويحترموا سيل كبير ويقدروا في نساء ، نعرف إلي تونس في خير، أول مرة نعرف شنوا معناها تظامن، أول مرة نحس إلي إن نحب الناس إلي قبلتها ليوم الكل ، حتى في اصف كل واحد يعطي في رايو من غير ما يسب إلي يخالفو، كل واحد مقتنع بفكرتو وما يحولش يأثر على غيرو، ليوم شفت مستقبل تونس ، ليوم عرفت إلي تونس غالية في قلوب التوانسة كل،ليوم نحيت من مخي فكرة اني نسيب بلادي ونمشي البلد الناس ،ليوم حسيت إلي احنا بدينا نرجعو في حق الشهداء، مهما تكون نتايج بعد هلعرس الكبير ، حتى كان ربح إلي يخالفني فالراي نبقى ديمة فرحان وديمة متفائل خاطر نعرف إلي توانسة هما إلي خطاروه ، وعطوه ثقتهم ، وفي صورة ما حب يلعب بذيلو ديمة فما توانسة يواجهه ويعاقفو اليد فاليد ضد إي واحد يمس معنى الحرية ... عند مدة ما كتبتش ، ما عنديش أفكار أما المرة هذي مش أفكار ، الكلام هذا ملقلب ومن جوجية ، هذا كلام من عند تونس خاطر كان جا تراب بلادي يتكلم راهو يصيح " نحبك يا شعبي " وإنا نحبكم يا توانسة... عاشت تونس وأكرم الله شهدائها ...